我將性命深深盤根心愛的土地
但是只有夜空饒恕無限的曠闊
慢慢共人燙佮溜皮,
燒入骨髓的炎日暫時焠息
留點點火星
薄板的翅股載我行過攲崎,飛過山
最後佇畏險的水沖,驚惶的山崁散掖
天暫光,露水佇花跤埋葬家己
為我散落佇水霧中的翅股哀悲
哀悲是對一個拖命人的量上
我早就飛過彼粒尊嚴徛在的山
轉來母親晟養的水帕尋家己的名
肩胛闊兩尺的世界充滿無限額的相思
佇瓊麻封鎖的戶碇生湠
我的身份成做腰顧囝兒,望伊
一吋一暝,是床母唯一的表示
囡仔 汝敢會問起? 彼個驚汝
傷風的身影佇汝醒來的時拍無見
囡仔,驚汝長暝厚惡夢的我
向望夜空對我的憐憫
佇汝的身上降臨
囡仔,我的身影毋是拍無見
只是予日頭雄雄遮閘去
2009/04/28柑仔溝 |