首部曲：青春少年時
佇阿爸的記持
以往旗山的景致
有一片一片的青翠
種甘蔗、芎蕉佮蕃薯
作穡人的辛苦有值錢
旗尾溪的溪水恬恬仔流
無分日抑是暝
閣會當掠蝦釣魚
日頭跤 芎蕉味
人人笑微微
歡歡喜喜過日子
規個鎮上充滿生機
二部曲：繁華攏是夢
如今阿爸強欲七十囉
現此時故鄉變成甚麼模樣
毋敢回頭返去想
想著伊會心稀微
甘蔗園漸漸無看見
芎蕉無價閣無市
若看著因一條條黃去
若聽著因一條條爛去的落地聲
逐家甘有聽著作穡人的心咧疼
芎蕉王國的美名欲哭哭無聲
罪無佇鄉親 罪無佇土地
問題到底出佇佗位
富裕的日子
繁華的過去
親像這領滴著芎蕉奶的衫
只有夢中再相見
三部曲：思慕的心情
思慕著汝
佇春天看見
溪仔邊的落地生根
開著深紅 橙紅 粉紅的花朵
佇熱天看見
田岸裡的稻仔
結滿一串串金黃色的飽穗
佇秋天看見
山頂的菅芒花
將山染著滄桑的色緻
佇寒天
阮輕輕叫著汝的名字
旗山啊旗山
四季輪轉的日子
汝永遠囥佇阮的心
上思念的彼個位 |
