全民做環保

台南市台語羅馬字研究協會 理事長 陳泰然

  廣義兮環保概念著是節省。地球上兮人愈來愈濟,地球兮資源一定會慢慢仔無夠通用,所以,咱一定愛知也通節省,甚至毋通胡白浪費 。 狹義兮環保概念就是減少汙染。最近,咱台灣政府嘛正咧推行節能減炭兮運動 。

  證嚴法師嘛定定給咱宣導一个概念:「地球是一个大乾坤,人體是一个小乾坤。」大、小乾坤道理相同,人若血流不止,著會性命無保;山坡地若亂開墾著像人咧動手術,大乾坤生態著破壞去。樹林是地球兮肺部,樹木納垢吐出新氧氣,所以,種樹仔來保護山坡地,清潔空氣佮延續萬物兮性命,閣會當吸收水分,樹根挽稠塗壤,較未因為落大雨予大水沖走,造成土石流。

  地球是咱唯一會當蹛人兮星球,所以,有兮國家攏強調搶救地球兮重要。即陣,我著來向諸位聽倌講一篇非常珍貴、有關環保兮報導予大家參考如下:

七冬前兮 2002 年 4 月 , 有一位關心環保兮 Ria Sides 專家 佇 " Crónicas de los Tiempos “ 雜誌頂面給咱講 :

  「即碼到 2020 年即十冬,地球猶閣有家庭用水、工商用水,閣有水通爽,毋拘,到 2070 年迄陣,咱人真有可能著愛改用礦物油來拭身軀啊,因為欠水,連查某人都愛給頭毛剃到光光光。」想著實在不可思議、真恐怖。

  閣講:「到時,地球會因為全球嚴重暖化兮結果,所有兮河川、水湖、水庫和地球兮地下水床,毋是汙染,著是凋涸涸。花草佮樹仔會變足少、足少,天嘛無啥會落雨,落落來兮雨,嘛定定是酸雨, 水會變做大家夢寐以求兮財寶,河川流過兮綠色區域,攏有武裝兮士兵咧守護。即碼,咱差不多一日愛啉 8 大杯兮水,到時干單會當啉半杯爾爾。 大概 80% 以上兮食物是人造兮。因為嚴重欠水,人兮皮膚會較凋,未曾老著饒紋規面, 20 歲兮少年家看起來未輸 4 、 50 歲兮老人,迄陣,人兮平均歲壽會降到差不多 35 歲。 查 夫人兮精和查某人兮卵發生變化,生出來兮紅嬰也毋是缺陷著是畸形, 皮膚癌佮空氣汙染引起兮傳染病和尿道疾病變做死亡主要兮原因。」

  紲尾閣講:「工商業變無法度順利發展,頭家有時會分珍貴兮水準做一部份兮月給, 次邊頭尾有噹時仔嘛會為著一屑仔水惌家娘諍起來。」

  所以,咱即碼,愛相信科學家兮警告,較緊想好對策,若無欲聽專家兮話,無欲好好你做環保,閣咧破壞山坡地兮水土,汙染環境,咱是非常罪惡哦!到迄陣,咱兮囝孫也有閣較好環保對策都已經未赴啊,凡勢會提早帶來地球兮毀滅和人類莫大兮死亡。

除了以上兮自然環保以外,嘛有足濟有心人士強力呼籲人類愛食素救地球,第一點, 因為 人兮身體並無食肉兮需要。第二點,人所飼兮動物是人類數量兮 3 倍,畜牲對稻草、玉米和小麥兮需求量特別大。第三點,每生產 1 公斤 兮動物肉著愛消耗 10 公斤 兮植物蛋白質。第四點,食素兮人致著心臟病兮機率會減少 30%,閣無致著其他病症兮風險,咱若會當莫食肉,按爾,咱著毋免飼赫爾濟兮牲牲,嘛會當春足濟兮植物來乎咱人類食。而且,專家閣給咱講,人類著毋免用赫爾曠闊兮牧地去飼遐兮牲牲,閣較予咱歡喜兮著是,咱干單用地球三分之一兮土地著會當飼全部兮人類。

素 食 賦

大家來食素,

你我緊了悟。

身體好照顧,

根本免進補。

 

大家來食素,

請莫再延誤。

人人做環保,

地球得救助。

行行菩薩道,

畜生免命無,

腹肚請做素食部,

莫做畜生兮墓仔埔。

 

  「全民做環保」,寫到茲暫時告一段落,諸位鄉親佮婦老,地球是養飼咱兮地母,請重視專家兮勸導,「早早做,毋通未赴卡來熬。」毋通到時予咱後代兮囝孫也束手無步,閣走無路!